काठमाडौं– वैदेशिक रोजगारीमा भिजिट भिसामार्फत विदेश जाने नेपालीको संख्या बढेपछि सरकारले यसबारे आवश्यक अध्ययन गर्न समिति गठन गर्ने निर्णय गरेको छ । श्रम, रोजगार तथा सामाजिक सुरक्षा मन्त्रालयले भिजिट भिसाको दुरुपयोग रोक्न यस्तो निर्णय गरेको हो ।
सरोकारवाला निकाय अध्यागमन विभागका महानिर्देशक, वैदेशिक रोजगार व्यवस्थापन महाशाखाका प्रमुख, त्रिभुवन अन्तर्राष्ट्रिय विमानस्थल अध्यागमन कार्यालयका प्रमुखसँगको छलफलपछि श्रममन्त्री शरतसिंह भण्डारीले अध्ययन समिति गठन गरेकोको मन्त्रालयले जानकारी दिएको छ ।
वैदेशिक रोजगार व्यवस्थापन महाशाखाका प्रमुख जीवलाल भुसालको संयोजकत्वमा सरोकारवाला निकायका प्रतिनिधि सदस्य रहनेगरी गठन गरिएको समितिले १५ दिनभित्र अध्ययन प्रतिवेदन तयार गर्नुपर्ने छ । अध्ययन समितिले दिएको प्रतिवेदनका आधारमा थप निर्णय लिइने मन्त्रालयले जनाएको छ । बिचौलिया, ट्राभल एजेन्सी र कन्सल्टेन्सीहरुले भिजिट भिसामार्फत वैदेशिक रोजगारीमा पठाउने गरेका तथ्य बहिरिएको भन्दै यसको दुरुपयोग रोक्न अध्ययन समिति गठन गर्नुपरेको बताइएको छ ।
वैदेशिक रोजगारीका लागि भिजिट भिसामा जानेहरु विभिन्न कठिनाइमा पर्ने गरेको र भोलिका दिनमा अझै यो समस्या बढ्ने देखिएपछि यसको निराकरण होस् भन्ने उद्देश्यले समिति गठन गरिएको मन्त्रालयका प्रवक्ता डण्डुराज घिमिरेले बताए । ‘यताबाट भिजिट भिसामा विभिन्न मुलुकमा जाने र उता पुगेपछि रोजगारीमा संलग्न रहेको पाइएपछि यस्तो गतिविधि रोक्नका लागि अध्ययन गर्न समिति गठन गरिएको हो,’ उनले भने ।
पछिल्लो समय विशेषगरी महिलाहरुलाई भिजिट भिसामा युएई, कतारलगायतका मुलुकमा पु¥याउने र घरेलु कामदारको रुपमा लैजाने गिरोह सक्रिय रहेको पनि मन्त्रालयले जनाएको छ । नेपाल सरकारले झण्डै एक दशकदेखि महिलाहरुलाई घरेलु कामदारको रूपमा वैदेशिक रोजगारीमा जान प्रतिबन्ध लगाउँदै आएको छ ।
प्रतिबन्धकाबीच पनि विभिन्न माध्यमबाट महिलाहरू भिजिट भिसामार्फत वैदेशिक रोजगारीमा जाने गरेका कारण सरकारको टाउको दुखाइ बनेको छ । दुई हप्ताअघि मात्रै भिजिट भिसामा कुवेत उडाइन लागेका २२ जना नेपाली महिलालाई त्रिभुवन अन्तर्राष्ट्रिय विमानस्थलको अध्यागमनले फिर्ता गरेको थियो । उनीहरु भिजिट भिसामार्फत अवैधरुपमा श्रमजन्य कार्यका लागि जान लागेको खुलेपछि फिर्ता गरिएको अध्यागमन कार्यालयले जनाएको छ ।
