काठमाडाैं - विश्व शौचालय दिवसको अवसरमा नेपाल पर्वतारोहण संघ (एनएमए)ले आज आयोजना गरेको सचेतना कार्यक्रममा वक्ताहरूले पर्वत सफाइको महत्त्वमा जोड दिएका छन्। उनीहरूले भविष्यका सन्ततिका लागि स्वच्छ र अनुकूल वातावरण सुनिश्चित गर्न पर्वतहरू सफा राख्नुपर्ने आवश्यकता औँल्याएका छन्।
पर्यटन विभागका निर्देशक डा.नारायण प्रसाद रेग्मीले पर्वत सफाइमा सबैको साथ आवश्यक रहेको बताए।
'हाम्रो पर्वतहरूमा फोहोरको थुप्रो जम्दै गएको छ। यो हाम्रो पुस्ताको चुनौती हो,'उनले भने'यसका लागि सामूहिक प्रयास आवश्यक छ। पर्वतारोहण गर्नेहरू, अभियान सञ्चालन गर्नेहरू र पत्रकारज्यूहरूलाई सरकारलाई सहयोग गर्न आग्रह गर्दछु।'
नेपाल पर्वतारोहण संघका प्रमुख सल्लाहकार आङ छिरिङ शेर्पाले पर्वतारोहण गर्ने टोलीहरूलाई फोहोर न्यूनीकरणका लागि डिस्पोजेबल सामग्रीको प्रयोग गर्न आग्रह गरे । ' सबै पर्वतारोही र अभियान टोलीहरूले आफ्नो फोहोर फर्काएर ल्याउँदैनन्। तर, डिस्पोजेबल सामग्री प्रयोग गरेर पर्वतीय प्रदूषण घटाउन सक्छौं,' उनले भने,'सरकारले पर्वतारोहण गर्ने टोलीहरूलाई डिस्पोजेबल सामग्रीको प्रयोग अनिवार्य गर्ने नीति ल्याउनुपर्छ। यसले पर्वत सफा राख्न मद्दत गर्नेछ।'
एनएमएका अध्यक्ष सन्तवीर लामाले सरकारलाई पर्वतहरू फोहोरमुक्त बनाउन उपयुक्त प्रणालीको विकास गर्न आग्रह गरे।'एनएमएले हरेक वर्ष पर्वत सफाइ अभियान गर्दै आएको छ। पछिल्ला वर्षहरूमा नेपाली सेनाले यो काम गरिरहेको छ। तर, अझै पनि टनका टन फोहोर पर्वतमा छ,'उनले थपे,' नेपाल सरकारको प्राविधिक शाखाको रूपमा हामी सरकारलाई पूर्ण समर्थन गर्न तयार छौं।'
कार्यक्रममा अभिनेत्री तथा मोडल उषा रज्जकले पनि पर्वत सफाइको महत्त्वबारे आफ्नो धारणा व्यक्त गरिन्। 'ूपर्वतबाट आएको हावा स्वच्छ र ताजा हुनुपर्छ। यो नै हाम्रो एक मात्र विकल्प हो,' उनले भनिन् , 'पर्वत र वातावरण स्वच्छ राख्नु हाम्रो जिम्मेवारी हो।'
कार्यक्रममा भारतीय संस्था सुलभ स्यानिटेशन क्लबको विशेष सहकार्य थियो। कार्यक्रममा पर्वतारोही, अभियान सञ्चालनकर्ता, वातावरणीय अभियन्ता र सञ्चारकर्मीहरूको उपस्थिति रहेको थियो। एनएमएका महासचिव मोहन लाम्सालले स्वागत मन्तव्य राखेका थिए भने वरिष्ठ उपाध्यक्ष ठाकुरराज पाण्डेले धन्यवाद ज्ञापन गरेका थिए।
