- पूर्वप्रधानमन्त्री डा. बाबुराम भट्टराई र राप्रपा प्रवक्ता ज्ञानेन्द्र शाहीले हिरासत पुगेर रविले भेटे
- रविको पक्राउ राजनीतिक प्रतिशोध भएको डा. भट्टराईको भनाइ
- रविको मानवअधिकार रक्षा गर्न राप्रपा नेता शाहीको माग
काठमाडौं– पर्साको वीरगञ्ज लैजाने तयारी भइरहेका बेला कास्कीको पोखरा पुगेर राष्ट्रिय स्वतन्त्र पार्टी (रास्वपा)का सभापति रवि लामिछानेलाई एकपछि अर्को विपक्षी नेताले भेट गरेका छन् । सहकारी ठगी, संगठित अपराध र सम्पत्ति शुद्धीकरण मुद्दामा अनुसन्धान खेपिरहेका लामिछानेलाई शनिबार राष्ट्रिय प्रजातन्त्र पार्टी (राप्रपा)का प्रवक्ता ज्ञानेन्द्र शाहीले भेट गरे । शाहीलेभन्दा पहिले नेपाल समाजवादी पार्टी (नेसपा)का अध्यक्ष तथा पूर्वप्रधानमन्त्री डा. बाबुराम भट्टराईले भेटेका थिए ।
रास्वपाले हिरासतमा रविमाथि अमानवीय व्यवहार भएको भन्दै विज्ञप्ति जारी गरेपछि दुई नेता रविलाई भेट्न हिरासत गएका हुन् । भेटपछि शाहीले लामिछानेको मानवअधिकार रक्षा गर्न माग गरेका छन् । ‘माननीय रवि लामिछानेको मानवअधिकारको रक्षा गरियोस् । कानुनी राज्यको पालना गर्नु हामी सबैको कर्तव्य हो,’ शाहीले सामाजिक सञ्जाल फेसबुकमा लेखेका छन् ।
उनले पोखरास्थित जिल्ला प्रहरी कार्यालयको हिरासतमा पुगेर शनिबार लामिछानेसँग भेट गरेका थिए । त्यस क्रममा लामिछानेले आफूलाई चितवनबाट पोखरा लैजाने क्रममा औषधिसमेत नदिएर दबाब दिएको भनेको र उक्त विषयमा सडक र सदनबाट सरकारको जवाफ माग्ने शाहीले बताए ।शाहीले भन्दा पहिले पूर्वप्रधानमन्त्री डा. भट्टराईले लामिछानेलाई कास्की प्रहरीको हिरासतमै भेटेका थिए । संक्षिप्त कुराकानी गरेर फर्किएपछि उनले लामिछानेमाथि सरकारबाट प्रतिशोधपूर्ण व्यवहार भएको टिप्पणी गरेका थिए ।
‘नयाँ राजनीतिक शक्तिहरूको उदय भइराखेको अवस्थामा एक सशक्त धारको प्रतिनिधित्व गर्ने व्यक्तिको रूपमा उहाँलाई बुझ्छु । त्यसैले उहाँप्रति मेरो सधैं सद्भाव पनि छ । जुन ढंगले अहिले उहाँलाई एकपछि अर्को गरेर दुःख दिने काम भइरहेको छ, यो अलि अस्वाभाविक लागेर र अन्यायपूर्ण भो भनेर नै ऐक्यबद्धता जनाउनका लागि आएको हुँ,’ उनले पत्रकारहरूसँग भने ।
रास्वपाले हालै रविको डायरी नै प्रहरीले गायब पारेको जनाएको छ । सरकारले लामिछानेलाई अपराधिजस्तो व्यवहार गरेको पनि आरोप लगाएको छ । कार्यवाहक महामन्त्री मनिष झाले विज्ञप्ति जारी गर्दै त्यसबारे छानबिनका लागि राष्ट्रिय मानवअधिकार आयोग र राष्ट्रिय तथा अन्तर्राष्ट्रिय मानवअधिकारकर्मीलाई गुहारेका छन् । उनका अनुसार पाँच वटा सहकारी ठगीको अनुसन्धानका क्रममा रहेका लामिछानेको नैसर्गिक मानवअधिकार हनन् भएको छ ।
रास्वपाले सभापति लामिछानेलाई चितवनबाट रातारात पोखरा लैजाने कार्यको पनि विरोध गरेको छ । प्रहरीले मंगलबार र बुधबार चितवनको सहारा सहकारीमा भएको ठगी प्रकरणमा बयान लिएर बुधबार बेलुका नै पोखरा लगेको थियो । बुधबार बयान चलिरहँदा पनि प्रहरीसँग रास्वपा नेता कार्यकर्ताको झडप परेको थियो । त्यसपछि प्रहरीले उनलाई सोही दिन बेलुकी पोखरा लगेको थियो । यसलाई लिएर रास्वपाले विरोध जनाएको हो ।
अब लामिछानेलाई वीरगञ्जको सानो पाइला सहकारीमा भएको ठगी आरोपबारे बयानका लागि लैजाने प्रहरीको तयारी छ । पर्सा जिल्ला अदालतले यसअघि नै लामिछानेसहितका आरोपीहरूविरुद्ध पक्राउ पुर्जी जारी गरिसकेको छ । यसअघि लामिछानेको वयान सूर्यदर्शन सहकारी पोखरा, सुप्रिम सहकारी बुटवल, स्वर्णलक्ष्मी सहकारी काठमाडौं र सहारा सहकारी चितवनमा भइसकेको छ । बयानका क्रममा उनले लागेका आरोपहरूलाई इन्कार गरेका छन् । बरु, राजनीतिक प्रतिशोध साँधेर फसाउन खोजेको बताउँदै आएका छन् ।
उनीसँग भेटेर फर्किएपछि नेसपा अध्यक्ष डा. भट्टराईले पनि लामिछानेलाई राजनीतिक प्रतिशोध साँधेर फसाउन खोजिएको बताएका हुन् । लामिछाने २ कात्तिकको साँझ काठमाडौंको वनस्थलीस्थित पार्टी केन्द्रीय कार्यालयबाट पक्राउ परेका थिए । उनी ३ कात्तिकको बिहानमात्रै पोखरा पुगे । उनै लामिछानेले यसअघि आफूलाई हिरासतमा अपराधिको जस्तो व्यवहार गरेको बताएका थिए । त्यसपछि रास्वपाले आफ्नो सभापति लामिछानेको हिरासत बसाइँबारे कुराकानीमा आधारित भन्दै एउटा विज्ञप्ति जारी गरेको थियो । त्यहाँ लामिछानेको मानवअधिकार हिरासतमा हनन् भएको उल्लेख थियो । अन्ततः नेसपा अध्यक्ष डा. भट्टराईदेखि राप्रपा प्रवक्ता शाही हिरासतमै भेट्न पुगेका हुन् ।
