ऊर्जामन्त्री दीपक खड्का आफ्नो कमजोरी लुकाउन सक्रिय बनेका छन् । स्वयंसेवी संस्था नेपाल स्काउटको पाँच करोड रुपैयाँभन्दा बढी भाडा नतिर्ने र सम्झौताभन्दा बढी स्काउटको जग्गा हडप्नेमा मन्त्री खड्काको संलग्नता प्रस्ट देखिन्छ । यो विषय संसद्को राज्य व्यवस्था तथा सुशासन समितिमा पुगिसकेको छ । अब समितिले कस्तो निर्देशन देलान् ? हेर्न बाँकी छ । तर, यतिबेला उनै खड्काको फाइँफुट्टी कम्ता छैन । सिसाको घरमा बसेर ढुंगा हान्ने प्रवृत्ति मन्त्री खड्काले देखाएका छन्, जुन बुद्धिम्तापूर्ण होइन ।
बरु, उनले आफ्नो कम्पनी खड्का ल्याण्ड डेभलपमेन्ट प्रालिमार्फत सरक्क विनाविवाद स्काउटको भाडा बक्यौता तिर्नुपर्छ । त्यसमा ढिला गर्नु हुँदैन । समयमा नबुझाएपछि जरिवानासहित भाडा लिने स्काउटको अडान नाजायज मान्न सकिँदैन । त्यही भएर जरिवानाविना भाडामात्रै बुझाउने मन्त्री खड्काको कम्पनीको तर्क स्वीकार गर्न योग्य छँदै छैन । अनि, बिहीबार प्रेस विज्ञप्तिमार्फत भनिएअनुसार साता दिनभित्रै बक्यौता रहेको सबै भाडा बुझाएर मन्त्री खड्काले उच्च नैतिक चरित्र प्रदर्शन गर्नैपर्छ ।
अर्कोतिर, नेपाल विद्युत् प्राधिकरणमा जसरी कार्यकक्ष स्थापना गराएका छन् र त्यहाँबाट कार्यकारी निर्देशक कुलमान घिसिङलाई निगरानी गर्ने अशोभनीय प्रदर्शन मन्त्री खड्काले गरेका छन् । ‘कहीँ नभएको जात्रा हाँडीगाउँमा’ भन्ने उक्तिको चरितार्थ गर्ने दायित्व मन्त्री खड्काको होइन । बरू, प्राधिकरणले झेल्दै आएका नीतिगत समस्या सम्बोधनका लागि पहल गर्ने भूमिका मन्त्रीको हो । तर, मन्त्री खड्का जग हँसाउने क्रियाकलापमा तल्लीन देखिएका छन् । यस्तो कार्यशैलीले राज्यलाई फाइदा पुग्दैन । चर्चामा आउन नाटक मञ्चन गर्नु आवश्यक छैन ।
यससँगै डेडिकेटेट फिडर र ट्रंकलाइन महसुलको बक्यौता यसअघि भएको मन्त्रिपरिषद् निर्णयअनुसार उठाउन सरकारले नै पहल गर्नुपर्ने भएको छ । किनभने यसअघि १५ मंसिरसम्ममा बक्यौता उठाउने निर्णय गर्ने निकाय मन्त्रिपरिषद् नै हो । यस्तो निर्णय आउनुअघि प्राधिकरणले बक्यौता बुझाउन् भनेर उद्योगहरूमा लाइन काट्ने गरेको थियो । त्यसलाई काउन्टर दिनेगरी मन्त्रिपरिषद्ले उद्योगीको घुमाउरो शैलीमा पक्षधरता लिएर १५ दिने बक्यौता बुझाउने अवधि तोकेको थियो । तर, प्राधिकरणका अनुसार एक रुपैयाँ बक्यौता उठेको छैन । यो लज्जास्पद हो । त्यसकारण मन्त्रिपरिषद्ले गरेको निर्णयअनुसार तत्काल वक्यौता उठाउनुपर्ने दायित्व बहन गर्न ऊर्जामन्त्री अग्रसर हुनुपर्छ ।
