काठमाडौं– प्रमुख प्रतिपक्षी दल नेकपा माओवादी केन्द्रले विगतमा दुई ठूला दलसँग मिलेर चुनाव लड्नु गल्ती भएको जनाएको छ । आइतबारबाट सुरु भएको केन्द्रीय समितिमा पार्टी अध्यक्ष पुष्पकमल दाहालले प्रस्तुत गरेको प्रतिवेदनमा उक्त विषय उल्लेख गरिएको हो ।
संविधान कार्यान्वयनसम्म आइपुग्दा सहकार्य ठीक भए पनि पछि चुनाव लड्नु गल्ती भएको माओवादीको ठहर छ । ‘युद्ध र संविधान कार्यान्वयनसम्म आइपुग्दा सहकार्य अनिवार्य थियो । तर, कुनै न कुनै रूपमा विगतमा कांग्रेस–एमालेसँग मिलेर चुनाव लड्नु गल्ती थियो भन्ने कुरा हामीले आत्मसमीक्षा गर्नुपर्छ,’ अध्यक्ष दाहालले प्रस्तुत गरेको प्रतिवेदनमा भनिएको छ ।
संविधान जारी भएपछि पहिलोपटक २०७४ मा भएको निर्वाचनमा माओवादी एमालेसँग मिलेर चुनावमा गएको थियो । त्यतिबेला एमालेसँग एकता गरेरै चुनावमा गएको माओवादी पछि अलग्गिएर २०७९ को निर्वाचनमा कांग्रेससँग मिलेर चुनाव लडेको थियो । माओवादीले कांग्रेस–एमालेलाई परम्परागत शक्तिको रुपमा लिएको छ । यस्तो अवस्थामा आफूहरु घुम्तीमा रहेको र राष्ट्रिय स्वतन्त्र पार्टीजस्ता नयाँ शक्तिले पनि भरपर्दो विकल्प दिन नसकेको ठहर गरेको छ । ‘नयाँ भन्नेहरूले पनि विचार, राजनीति र कार्यशैलीको भरपर्दाे ढंगले विकल्प दिन नसकेको देखिन्छ । अब माओवादीले क्रान्तिकारी विकल्प बन्नका लागि सस्तो लोकप्रियताको आधारमा भन्दा पनि स्पष्ट विचार, राजनीति, कार्यक्रम र कार्ययोजनासहित अगाडि बढ्नुपर्छ,’ प्रतिवेदनमा भनिएको छ ।
माओवादीले लोकतन्त्रको ‘सर्भिसिङ’ गर्ने समय आइसकेको आवाजसमेत बैठकमा उठाएको छ । ‘अब लोकतन्त्रलाई पुरानै ढर्रामा चलाउन सकिँदैन । सर्भिसिङ गर्ने बेला आयो,’ माओवादी अध्यक्षको प्रतिवेदनमा भनिएको छ ।माओवादीले कांग्रेस–एमालेप्रतिको घट्दो जनविश्वास र माओवादी आकर्षणले अब आफ्नो राजनीतिक धारमा चुनाव लड्नुपर्छ भन्ने शिक्षा पाएकोसमेत जनाएको छ । ‘हामी घट्नुपर्ने घटिसक्यौं, अब बढ्नेतिर लाग्यौं । तर, अरुभन्दा फरक हुन सकिएन भने हुँदैन । ०८४ को चुनावका लागि अहिलेदेखि लाग्नुपर्छ । अब वैकल्पिक शक्ति हामी नै हो । कांग्रेस–एमालेले लिन सक्दैनन्,’ दाहालले भने ।
पछिल्लो राजनीतिक सवालमा एमाले अध्यक्ष केपी शर्मा ओलीको सरकार नांगिदै गएको माओवादीका ठहर छ । ‘हामीले सुरू गरेका कामहरू, सुशासनको थालनीलाई सरकारले पन्छाउँदै गइरहेको छ । सरकार र यसको काम जनताको पक्षमा छैन, जनताहरू खुसी छैनन् अहिलेको सरकारसँग । केपी ओली सरकार आफैं नांगिदै गइरहेको छ ।’
एमालेको राजनीतिक प्रतिवेदन
माओवादीबाट पटक–पटक धोका
नेकपा एमालेको केन्द्रीय समिति बैठक पनि आइतबारबाटै सुरु भएको छ । पार्टीको मुख्यालय च्यासलमा सुरु भएको केन्द्रीय समितिमा माओवादी छाडी कांग्रेससँग मिलिजुली सरकार निर्माण गरिएको विषयलाई प्राथमिकतामा राखिएको छ ।
दुई–दुई पटक प्रधानमन्त्री बनाउन एमालेले सघाउँदा पनि माओवादी अध्यक्ष पुष्कमल दाहालले पुरानै चरित्र दोहो¥याएपछि सरकारबाट बाहिरिएर कांग्रेससँग मिलेको अध्यक्ष ओलीको राजनीतिक प्रतिवेदनमा उल्लेख छ । ‘राष्ट्रपतिको निर्वाचनको बिन्दुसम्म आइपुग्दा त माओवादी केन्द्र दाउपेच, विश्वासघात र शक्ति केन्द्रहरूको दबाबसामु आत्मसमर्पणको तल्लो बिन्दुसम्म ओर्लियो । त्यस स्थितिमा हामी सरकारमा बसिरहन सक्ने अवस्था हुँदैनथ्यो । हामी सरकारबाट बाहिरियौं,’ पहिलोपटकको सत्ता समीकरण छाड्नुका कारण राजनीतिक प्रतिवेदनमा भनिएको छ ।
पटक–पटकको राजनीतिक धोकापछि कांग्रेससँग मिल्नुको विकल्प नदेखिएको प्रतिवेदनमा उल्लेख छ । ‘नेकपा एमाले र नेपाली कांग्रेसका बीचमा निर्माण गरिएको यस सहकार्यको मुख्य उद्देश्य मुलुकमा राजनीतिक स्थायित्व सुनिश्चित गर्नु हो । राजनीतिक अस्थिरता गहिरिँदै जाँदा यसले जनतामा नैराश्य वृद्धि गर्ने र लोकतान्त्रिक गणतन्त्रका विरुद्धमा रहेका शक्तिहरूको मनोबल बढ्दै गएर लोकतन्त्र नै संकट पार्ने स्थितिलाई बोध गर्दै हामी यसरी बढ्दै जाने र मुख्य राजनीतिक निष्कर्षमा आइपुगेका हौं,’ एमालेको राजनीतिक प्रतिवेदनमा भनिएको छ ।
कांग्रेससँग मिलेर सरकार बनाएपछि अर्थतन्त्रमा सुधार आएको एमाले प्रतिवेदनमा उल्लेख छ । ‘यस अवधिमा मुलुकको अर्थतन्त्रमा क्रमशः सुधार हुँदै आएको छ । राजनीतिक स्थायित्वको सन्देश र बलियो सरकारको गठनसँगै निजी क्षेत्रमा विश्वास अभिवृद्धि भएको छ । वर्तमान सरकारले अर्थतन्त्रलाई ओरालो लाग्नबाट रोकेर क्रमशः सकारात्मक दिशामा अगाडि बढाएको छ,’ प्रतिवेदनमा भनिएको छ ।
ओलीले प्रस्तुत गरेको प्रतिवेदनमा राजस्व वृद्धि भएको, पुँजीबजारमा सकारात्मक सुधार हुँदै गएको विषयलाई अर्थतन्त्र सुधारको सूचकका रुपमा उल्लेख गरिएको छ । ‘पुँजीबजारमा सकारात्मक सुधार हुँदै आएको छ । गत वर्षको यसै अवधिको तुलनामा राजस्व वृद्धि भएको छ, निर्यात तथा आयातमा सुधार भएको छ र पुँजीगत खर्चमा वृद्धि भएको छ । पहिलोपल्ट नेपालको सार्वभौम क्रेडिट रेटिङ सम्पन्न भएको छ र नेपालले दक्षिण एसियामा भारतपछिको दोस्रो स्थान सुरक्षित गरेको छ,’ राजनीतिक प्रतिवेदनमा भनिएको छ ।
अध्यक्षको प्रतिवेदनमाथि २७ केन्द्रीय सदस्यले आ–आफ्नो धारणा राखेको प्रचार विभाग प्रमुख राजेन्द्र गौतमले जानकारी दिए । बैठकमा प्रत्येक केन्द्रीय सदस्यलाई तीन मिनेट बोल्ने समय दिइएको छ ।
भीम रावललाई कारबाहीबारे– विष लागेको औंला झर्छ
बैठकमा हालै नेता भीम रावललाई गरिएको कारबाहीमाथि केन्द्रीय सदस्यद्वय प्रकाश शाह र झपटबहादुर रावलले विरोध जनाएका छन् । एमालेको पुस १० गते बसेको केन्द्रीय सचिवालय बैठकले पूर्वउपाध्यक्ष भीम रावललाई पार्टीबाटै निकाला गर्दै विन्दा पाण्डे र उषाकिरण तिम्सेनलाई छ महिनाका लागि निलम्बनको निर्णय गरेको थियो । शाह र रावलको विरोधको बावजुद् उक्त निर्णय आइतबार केन्द्रीय समिति बैठकबाट अनुमोदन भएको छ ।
ओलीको राजनीतिक प्रतिवेदनमा रावललाई विष लागेको औंलाको रुपमा चित्रण गरिएको छ । ‘जुन औंलामा विष लागेको छ, त्यही औंला झर्ने हो । विषाक्त औंलालाई जोगाउन सिँगै हात र कहिलेकाहीँ त पूरै शरीरको बलिदान दिन सकिँदैन । हामीले यही गर्दै आएका छौं र भोलि पनि यही गर्नेछौं ।’
-1736657698.jpg)
