काठमाडौं– गैरआवासीय नेपाली संघ (एनआरएन)ले दोस्रो अन्तर्राष्ट्रिय युवा–पिएनओज् सम्मेलन थाइल्याण्डको बैंककमा आयोजना गर्ने भएको छ । संघले आइतबार पत्रकार सम्मेलन गरी दुवै सम्मेलनबारे जानकारी दिएको हो ।
संघको एसिया प्रशान्त क्षेत्रीय ‘संगम’ कम्बोडियामा गरिने पनि एनआरएनले जनाएको छ । थाइल्याण्डमा हुने युवा सम्मेलनको मिति आगामी १५ र १६ मार्च तय गरिएको छ । १८–१९ मार्चमा क्षेत्रीय सम्मेलन गरिने संघले जनाएको छ ।विश्वका विभिन्न देशमा छरिएका युवालाई एकतामा ल्याउन युवा सम्मेलन आयोजना गरिएको पत्रकार सम्मेलनमा जानकारी दिइयो । ‘विदेशमा रहेका युवा अनि दोस्रो पुस्ताका गैरआवासीय नेपालीलाई पनि अपनत्व महसुस गराई मातृभूमिसँग जोड्नु वर्तमान अपरिहार्यता भइसकेको छ । अर्कोतर्फ दोस्रो विश्वयुद्धपछि बर्मा, थाइल्याण्ड, मलेसिया, सिंगापुर, फिजी र मोरिससजस्ता देशहरुमा सातौं लाख नेपाली मूलका युवाहरु पहिचानको खोजी गर्दै नेपालको समृद्धिमा पुस्तौंदेखि जोडिन खोजिरहेका छन्,’ संघद्वारा जारी विज्ञप्तिमा भनिएको छ ।
नेपाली प्रवासी युवाहरूलाई सशक्त बनाई नेपालको समृद्धि र विकाससँग जोड्ने अन्तर्राष्ट्रिय युवा सम्मेलनको मुख्य उद्देश्य रहेको संघका अध्यक्ष डा. बद्री केसीले बताए । सम्मेलनले नेपाली प्रवासी युवा, पिएनओज्, र नेपालका स्थानीय युवाहरूबीच मजबुत साझेदारी स्थापना गर्ने, युवामा सशक्तीकरण र नवप्रवर्तनको संस्कृतिलाई प्रेरित गर्नका लागि महत्वपूर्ण भूमिका खेल्ने उनको भनाइ छ । यो सम्मेलनले युवाको संघर्ष अनि सफलताका कथा र सिकाइहरूको आदान–प्रदान गर्ने मञ्चको अपेक्षा रहेकोसमेत उनले बताए ।
‘यो सम्मेलनले नेपाली प्रवासी युवा र नेपालका स्थानीय युवाबीच मजबुत सम्बन्ध स्थापना गर्ने छ । साथै शिक्षा, रोजगारी र सामुदायिक विकासमा केन्द्रित सहकारी परियोजनाहरू निर्माण गर्न मद्दत पुग्ने छ,’ विज्ञप्तिमा भनिएको छ । युवा बेरोजगारी, सीप विकास र सुरक्षित आप्रवासन कार्यात्मक योजना प्रस्तुत गर्नेसमेत संघको भनाइ छ ।
-1736657698.jpg)
