नेपाली राजनीतिको मियो विकास हुनुपर्ने हो । तर शीर्ष नेताहरुको बोली सुन्दा यो सत्ताको दाउपेचबाहेक केही देखिन्न । कांग्रेसको सहयोगमा माओवादी अध्यक्ष पुष्पकमल दाहाल प्रधानमन्त्री हुँदा एमाले नेतृत्वले सरकार चाँडै ढल्ने ठोकुवा गर्थे भने एमालेको सहयोगमा हुँदा कांग्रेसले । अहिले दाहालको सरकार ढलेर एमाले अध्यक्ष केपी शर्मा ओली प्रधानमन्त्री छन् । अब दाहाल पनि के कम– प्रायःजसो मञ्चमा ओली सरकार ढल्न कुनै समय बाँकी नरहेको ठोकुवा गर्छन् उनी । कहिले खबरदारीसभामा पुगेर सरकार कुहिएर झर्ने दाबी गर्छन् त कहिले पार्टीको बैठकमै ।
हुँदाहुँदा सोमबार सिन्धुपाल्चोकको सुकुटे पुगेका दाहालले मंगलबार ओली सरकार ढल्नै लागेको बताउन भ्याए । खासै काम नभएको सरकारलाई बरु दाहालले यस्तै अभिव्यक्ति दिएर काम दिएकोझैं देखिन्छ । किनकि प्रायजसो मञ्चमा प्रधानमन्त्री ओलीको काम हुन्छ– दाहालको भाषणको जवाफ दिनु ।
दाहालको दाबीलाई ओलीको जवाफ हुन्छ– काम गर्न नदिने प्रपञ्च । संयोग हो या सेटिङ, दुवै नेताको बोली सत्य सावित भइरहेको देखिन्छ । दाहालले काम गर्न नदिन भन्दै सरकार ढलिहाल्छ भनिरहने, यसको जुहारी खेल्दै ओलीले कामै नगर्ने । अहिले भइहेकै यही छ । कांग्रेस र एमाले मिलेर झण्डै दुईतिहाइको सरकार बनेको छ महिना पूरा भयो । तर सरकारले न त विकासका काम गर्न सक्यो न त संघीयता कार्यान्वयनमा लैजान आवश्यक कानुन बनाउन । बरु सदन खुलाउन छाडेर अध्यादेश ल्याउँदै सत्ता चलाइरहेको छ यो गठबन्धनले ।
विकासको नाममा कुनै परियोजना अघि बढाउन सकेको छैन । सरकार विद्युत् प्राधिकरणमा किचलो गर्ने, भर्खरै बन्दै गरेको पार्टीका सभापति रवि लामिछानेमाथि प्रतिशोध साँध्नेजस्ता सानातिना काममा अल्झेको देखिन्छ । शक्तिशाली पार्टी मिलेर सत्ता सञ्चालन भइरहेको बेला कूटनीति लाजमर्दो तरिकाले बिग्रेको छ । यस्तो अवस्थामा पनि न त कूटनीति सुधार्ने पक्षमा लागेको छ न त आफ्नो कमजोरी देखाउनै ।
कानुन बनाउन, समस्याका छिद्र पत्ता लगाउन जनताले चुनेर पठाएका प्रतिनिधिको यो तालले देशको उन्नति हुने चाल देखिन्न । देशको आर्थिक अवस्था दिनप्रतिदिन ओरालो लागेको छ । यस्तो अवस्थामा पनि सत्ताकै जुहारी चलाउनु विलकुल गलत छ । आफू जहाँ जस्तो अवस्थामा छ त्यहीबाट जनताको काम गरौं, देशको लागि काम गरौं । सरकार ढल्छ र टिक्छ भनेर भाषणबाजी छाडेर काममा खटे पक्कै जनताले पुरस्कृत गर्ने छ नै, नभए प्रस्ट छ जुनसुकै पार्टी होस् दण्डको भागीदार बन्नुपर्ने छ ।
-1736657698.jpg)
