पोखरा– मनाङ मस्र्याङदी क्लबले पोखरामा जारी १८औँ आहा रारा गोल्डकप फुटबल प्रतियोगिताको उपाधि हात पारेको छ । पोखरास्थित पोखरा रंगशालामा शनिबार सम्पन्न फाइनल खेलमा मनाङले नेपाल प्रहरीको विभागीय टिम नेपाल पुलिस क्लबलाई ट्राइब्रेकरमा पराजित गर्दै छैटौं पटक उपाधि हात पारेको हो ।
सहारा क्लब पोखराको आयोजनामा फागुन २२ गतेदेखि सञ्चालन भएको प्रतियोगिताको फाइनलमा मनाङले पुलिसविरुद्ध टाइब्रेकरमा ४–३ को जीत निकाल्दै कीर्तिमानसहित ६ पटक उपाधि चुमेको हो ।
निर्धारित ९० मिनेट तथा थप गरिएको ३० मिनेटको अतिरिक्त समयको खेलमा समेत दुवै टोलीले गोल गर्न नसकेपछि खेलको निर्णय ‘पेनाल्टी सुटआउट’बाट गरिएको थियो । टाइब्रेकरमा मनाङका अन्जन विष्ट, पुजन उपरकोटी, सुरज विक र रन्जन विष्टले गोल गर्नुभएकामा निशान लिम्बूको प्रहार पुलिसका गोलकिपर रोशन खड्काले रोक्न सफल भएका थिए ।
पुलिस क्लबका तर्फबाट भोला सिलवाल, हेम तामाङ र बुद्धबल तामाङले गोल गर्दा अजित भण्डारी र तेज तामाङको प्रहार खेलको मनाङका गोलकिपर अशोक बरालले रोकेका थिए । तामाङको प्रहार रोक्दै मनाङलाई छैटौंपटक आहा रारा गोल्डकपको उपाधि दिलाएका बराल ‘म्यान अफ द फाइनल’ घोषित भएका थिए ।
प्रतिस्पर्धात्मक खेलको नियमित तथा अतिरिक्त समयमा दुवै टोलीले गोलका अवसर सिर्जना गरे पनि सदुपयोग गर्न सकेका थिएनन् । मनाङका अन्जन विष्ट, विमल राना तथा पुलिसका भरत शाह, निरकुमार राईले प्राप्त अवसर खेर फालेका थिए ।
पुलिसले क्वार्टरफाइनलमा आयोजक सहारालाई टाइब्रेकरमा ४–२ तथा सेमिफाइनलमा थ्री स्टार क्लबलाई ३–० ले हराउँदै फाइनलमा स्थान बनाएको थियो । मनाङले क्वार्टरफाइनलमा झापा माथि १–० तथा सेमिफाइनलमा त्रिभुवन आर्मी क्लबमाथि ३–२ को जीत निकाल्दै फाइनल प्रवेश गरेको थियो ।
उपाधि विजेता मनाङले ट्रफीसहित रु दश लाख एक हजार तथा उपविजेता पुलिसले रु पाँच लाख एक हजार पुरस्कार प्राप्त गरे । पुलिसका अजित भण्डारी प्रतियोगिताको ‘सर्वोत्कृष्ट खेलाडी’ घोषित हुँदै एक थान स्कुटर पुरस्कार प्राप्त गरे ।
त्यसैगरी मनाङका अशोक बराल उत्कृष्ट गोलकिपर, सुरज विक डिफेन्डर, नितिन थापा मिडफिल्डर, अञ्जन विष्ट उत्कृष्ट फरवार्ड तथा फुजा टोपे उत्कृष्ट प्रशिक्षक घोषित हुँदै जनही रु १५ हजार तथा ट्रफी पुरस्कार प्राप्त गरे । पुलिसका भरत शाह तथा निरकुमार राई, मनाङका अञ्जन विष्ट, थ्री स्टारका सुशन श्रेष्ठ र सहाराका त्रिदेव गुरुङले समान दुई गोल गरेकाले सर्वाधिक गोलकर्ताको रु २५ हजार पुरस्कार पाँचैजनाले दामासाहीले प्राप्त गरेका थिए ।
