प्रश्न गरेरै सत्तामा पुगेका नेताहरु हिजोआज प्रश्न गर्ने मिडिया देख्नासाथ कुदिहाल्ने दृश्य सामाजिक सञ्जालमा छाएकै छ । सत्तारुढ दलका शीर्ष नेताहरु अचेल सकेसम्म मिडिया ‘स्किप’ गरिरहेका छन् । सवालजवाफमै उत्रिए आफूनिकटको र आफूअनुकूलको मिडियासँगमात्र बोल्छन् ।
स्टन्ट, लोकप्रियवाद र व्यक्तिवादका भर्याङ चढेर सत्तामा उक्लिएका नेता हुन, प्रधानमन्त्री केपी शर्मा ओली । कुनै बेला उखान टुक्का र कथा हालेर जनतालाई मक्ख पार्नसक्ने ओलीमाथि हिजोआज भने तिनै जनता सत्तोसराप गर्नतिर लागेका छन् । पार्टीमा आफ्नो आलोचना गर्नेलाई निषेधको रणनीति लिएका ओली यही कारण ‘डिफेन्सिभ’ र आक्रामक बन्न थालेका छन् ।
गत असार मसान्तमा सत्ता सम्हालेका प्रधानमन्त्री ओलीको यो कार्यकालको काम लगभग नेपाल कम्युनिस्ट पार्टीका महासचिव नेत्रविक्रम चन्दले भनेझैं ‘यो सरकार ढल्दैन’ भनेर बितेको छ । जनता र मिडियाको प्रश्नबाट भागेका ओलीले आइतबार भने प्रतिनिधिसभामै सांसदहरुको प्रश्न सामना गर्नुपर्यो । एकीकृत समाजवादीका सांसद प्रकाश ज्वाला, माओवादीका सांसद वर्षमान पुन र आमजनता पार्टीका प्रभु शाहको प्रश्नमा ओली निकै आक्रोशित र असंवेदनशील बनेको देखिए । प्रतिनिधिसभा जनताले चुनेर पठाएको प्रतिनिधिहरुको सभा हो । यही सभाबाट कार्यपालिका अर्थात् सरकार प्रमुख चुनिन्छन् । त्यसैले व्यवस्थापिकाप्रति प्रधानमन्त्री उत्तरदायी हुनुपर्ने हो ।
तर सांसदहरुको प्रश्नमा ओलीको प्रतिशोध, हेलाहोचो प्रवृत्ति कति पनि सुहाउँदो थिएन । पहिले मन्त्री नै भइसकेका भए पनि सरकारबाट बाहिरिएपछि मन्त्रालयका काममा ‘एक्सेस’ पाइँदैन । त्यसैले पूर्वमन्त्रीले प्रधानमन्त्रीलाई प्रश्न गर्न पाइन्छ । यसैगरी एक्लो सांसद देखेर झर्को र फर्को गर्ने हक प्रधानमन्त्रीलाई छैन । प्रधानमन्त्री ओलीले प्रभु साहमाथि गरिएको व्यवहारमा संवेदनहीनता झल्कन्थ्यो ।
कतिसम्म भने प्रधानमन्त्रीले साहको प्रश्नको जवाफसमेत दिन उचित ठानेनन् । प्रतिपक्षी नेताको सम्बोधनमा प्रश्नको सामना गर्नुपर्छ भनेर सदनमै गयल भएका प्रधानमन्त्री ओलीमाथि गतिलो प्रश्न साहले गरेका थिए । तर साहमाथि ओलीले मानमर्दन गर्ने काम गरे । उल्टै ओलीको दल एमालेका प्रमुख सचेतक महेश बर्तौलाले साहले प्रधानमन्त्रीको मानमर्दन गरेको दाबी गरे ।
प्रधानमन्त्री र सत्ताका नेताहरु कतिञ्जेल प्रश्नबाट भाग्ने ? भोलिको ब्याट ग्राउन्ड निर्वाचन नै हो । फेरि प्रश्न आफैंबाट सुरु गर्नुपर्ने दिन पनि आउन सक्छ । प्रश्न ऐना हो । आफू सुध्रने मौका हो । त्यसैले देशको अभिभावकजस्तो पदमा बसेका प्रधानमन्त्रीले यस्तो व्यवहार सुधारोस् ।
-1739894362.jpg)
