काठमाडौं - काठमाडौं महानगरपालिकाले गराएको जरिबाना राप्रपाले नतिर्ने भएको छ । राप्रपा पार्टीका प्रवक्ता मोहन श्रेष्ठले मेयर बालेन शाहले पार्टीलाई १ लाख जरिबाना गर्ने निर्णय गरेपनि त्यो नतिर्ने बताएका हुन् ।
पार्टीले काठमाडौँ महानगरपालिकाका मेयर बालेन शाहले राप्रपा र राजसंस्थाप्रति वक्रदृष्टि लगाएको आरोप समेत लगाएको छ । पार्टी प्रवक्ता मोहन श्रेष्ठले महानगरले पार्टीलाई १ लाख जरिबाना गर्ने निर्णय गरेपनि त्यो नतिर्ने बताए । उनले आइतबार पूर्वाराजा ज्ञानेन्द्र शाहको स्वागतमा अध्यक्ष राजेन्द्र लिङ्देनसहित पार्टी सिंगो सहभागी भएको तर त्यहाँ राप्रपाको झण्डा नभएको बताए ।
‘जरिवाना पूर्वाग्रही हो । कमल थापालाई पत्र नकाट्ने, दुर्गा प्रसाईंलाई पत्र नकाट्ने तर राप्रपालाई मात्रै लक्षित गरेर पत्र काटिनु भनेको यो राजसंस्था र राप्रपाप्रतिको बालेनको वक्रदृष्टि हो’, उनले भने, ‘यो पूर्वाग्रही सोच हो । राप्रपाले जरिबाना तिर्दैन ।’
पूर्वराजा ज्ञानेन्द्र शाह पोखराबाट फर्किँदा आइतबार राप्रपासहितका राजावादीहरू स्वागतका लागि विमानस्थल क्षेत्रमा पुगेका थिए । पूर्वराजालाई स्वागत गर्ने क्रममा एयरपोर्ट, तिलगंगा गौशाला लगायत सार्वजनिक क्षेत्रमा फोहोर गरेको भन्दै महानगरपालिकाले राप्रपालाई १ लाख जरिबाना गर्ने निर्णय गरेको थियो ।
-1739894362.jpg)
