काठमाडौं – वैदेशिक रोजगारीका नाममा म्यानपावर, कन्सल्टेन्सी र ट्राभल एजेन्सीबाट पीडित भएकाहरुले बुधबार माइतीघर मण्डलमा प्रदर्शन गरेका छन् । प्रदर्शनमा सहभागी पीडितहरुका अनुसार मुलुकभरबाट ८० हजारभन्दा बढी नागरिक वैदेशिक रोजगारीका नाममा ठगिएका छन् ।
आफूहरुको माग कहिले र कुन सरकार आएपछि सुनुवाइ हुने हो भन्दै आन्दोलनमा सहभागीहरुले प्रश्न गरेका छन् । विदेश पठाइदिने नाममा सोझासाझा नागरिकलाई ठगी गर्नेहरुलाई सरकारले जोगाएर राखेको भन्दै उनीहरु आक्रोशित भएका छन् ।
विगत २५ महिनादेखि निरन्तर आफ्ना समस्याहरु राख्दा पनि सरकारले सुनुवाइ नगरेको आन्दोलनलाई नेतृत्व गरिरहेका पीडित दीपक रावलले बताए । ‘हामीले गृहमन्त्री, श्रममन्त्रीदेखि विभागका पदाधिकारीलाई निरन्तर भेटिरहेका छौं तर अहिलेसम्म हाम्रो समस्याको सम्बोधन भएको छैन ।
यो आन्दोलन आनिश्चित्कालका लागि हो,’ रावलले भने । अब देशभरबाट संगठन बनाएर आन्दोलनलाई थप सशक्त बनाउने उनले बताए ।
