कास्की -गण्डकी प्रदेशको राजधानी पोखरामा शनिबारदेखि दोस्रो संस्करणको ‘केपी ओली कप’ राष्ट्रिय खुला टी–२० पुरुष क्रिकेट प्रतियोगिताको सुरु हुँदैछ । मदन भण्डारी स्पोट्र्स एकेडेमीको आयोजनामा पोखरा रङ्गशालास्थित क्रिकेट मैदानमा खेलाइने प्रतियोगिताको सम्पूर्ण तयारी पूरा भएको आयोजकले जनाएको छ ।
प्रतियोगितामा कुल १६ टोलीको सहभागिता रहने छ । उद्घाटन खेलमा शनिबार पोखरा महानगरपालिका र स्याङ्जा क्रिकेट क्लबबीच प्रतिस्पर्धा हुने स्पोर्टस् एकेडेमीका गण्डकी प्रदेश अध्यक्ष गिरमान गुरुङले जानकारी दिए । खेल तालिकाअनुसार समूह ‘ए’ मा सिइसी काठमाडौँ, हेटाँैडा एसए, पोखरा महानगर क्रिकेट क्लब र स्याङ्जा क्रिकेट क्लब छन् ।
समूह ‘बी’ मा चितवन क्रिकेट क्लब, ग्रेट हिमालय क्रिकेट एसोसिएसन, गण्डकी हिरोज क्रिकेट क्लब र हिमालयन क्रिकेट एसोसिएसन रहेका उनले बताए । गुरुङका अनुसार समूह ‘सी’ मा लुम्बिनी खुकुरी क्रिकेट क्लब, मधेस प्रदेश क्रिकेट क्लब, हिमाल फ्रेन्ड क्रिकेट क्लब र कर्णाली एकेडेमी तथा समूह ‘डी’ मा सुन्दर हेरचाह क्रिकेट क्लब, आत्रेय क्रिकेट एसोसिएसन, मालपोखरी क्रिकेट क्लब र होरिजोन क्रिकेट क्लब रहेका छन् ।
यसअघि पहिलो संस्करणको खेलमा सात प्रदेश र तीन विभागीय क्लबको सहभागिता थियो । उक्त संस्करण मधेस प्रदेशले जितेको थियो । भोलिदेखि सुरु हुने प्रतियोगिता आगामी वैशाख ५ गतेसम्म सञ्चालन हुनेछ । प्रतियोगिताको विजेताले नगद रु १० लाख र उपविजेताले नगद रु पाँच लाखका साथमा ट्रफी, मेडल तथा प्रमाणपत्र प्राप्त गर्नेछन् ।
यसैगरी ‘म्यान अफ दी सिरिज’ले रु ३० हजार, वेष्ट बलर, बेष्ट ब्याटरले जनही रु १० हजार र ‘म्यान अफ दी म्याच’ले रु पाँच हजारका साथमा ट्रफी प्राप्त गर्ने एकेडेमीका केन्द्रीय अध्यक्ष धुव्र आचार्यले जानकारी दिए । प्रतियोगिता सम्पन्न गर्न रु एक करोड ३० लाख खर्च हुने आयोजकले जनाएको छ । एकेडेमीका संरक्षकसमेत रहनुभएका प्रधानमन्त्री एवं नेपाल कम्युनिष्ट पार्टी (एमाले)का अध्यक्ष केपी शर्मा ओलीको नाममा प्रतियोगिता गर्न लागिएको हो ।
